حرصت الفنانة رشا سامي العدل على إحياء ذكرى والدها الفنان الكبير سامي العدل، حيث شاركت متابعيها بكلمات مؤثرة مليئة بالحب والحنين، عبّرت فيها عن افتقادها العميق له بعد مرور 10 سنوات على رحيله.
رشا سامي تحيي ذكرى والدها الفنان سامي العدل
ونشرت رشا سامي عبر حسابها الرسمي بموقع “فيسبوك”، منشورًا، قالت فيه: “اتولدت واتربيت مع الشاب اللي في أول صورة لعبت واتدلعت وسافرت وصيفت واتدللت”.
وأضافت: “كان ساعتها شاب في أول مشواره بس ده ما منعهوش يدلع بنته البكر الوحيدة دلع مسخ مبالغ فيه على أيامنا، لبس من أشهر محلات، أعياد ميلاد في أغلى الأماكن، مصيف في أحسن المصايف والأوتيلات، كنت بنت بابا ودلوعته”.

رشا سامي تروي تفاصيل حياة والدها سامي العدل
وأضافت رشا أن “الراجل اللي في الصورة التانية دي كان صاحبي، وصديقي الصدوق، كنا صناديق أسرار بعض، كنا نقعد نتناقش ونتجادل، وكتير نتخانق، ويتقمص دور الأب، وكنا ننزل نتفسح سوا، ونسافر، نضحك ونفَسّي دماغنا، و شوية وكبر الراجل، وبقى كبير شوية، واتعلّق ببنتي، وأصبح ابني الدلوع”.
واستكملت رشا: “أنا نفسي في شاي بلبن وبقسماط أنزل من بيتي جري، أروح أُدلّعه بت يا روشا، ما تيجي توديني لعمّك فلان، علشان السواق راح، ومش هعرف أسوق أجري جري، فرحانة إنه بيعتمد عليّا، ومحتاجني جنبه، حتى لو كانت تلاكيك منه في بعض الأحيان”.
وزادت: “رشا، ما تخليكي جدعة، وتجددي لي رخصة العربية، أو ترخصي لي العربية، علشان مش بقدر أصحى بدري، وأمشي في الزحمة والحر يااااااه.. على إحساس إني بنجز له مشوار وبريّحه”.

الذكرى السنوية الـ 10 لوفاة العظيم بابا سامى العدل
وتابعت: “زي النهاردة من 10 سنين اتحرمت من الحاجات الصغيرة دي اللي كان ليها معاني كبيرة، بالنسبالي مش بس الحاجات الكبيرة المعروفة للكل زي السند والضهر ووجوده بحسه حواليا.. 10 سنين وبجد مش لاقية أي راحة وكلها حاجات مؤقتة وهاتزول أو استمرارها مش بيسد خانة وجود بابا في حياتي”.
واستطردت رشا: “10 سنين بدور عليك في كل ثانية ولحظة ودقيقة وساعة ويوم احتياجي لك محاوطني في كل حاجة، واحشني قوى يا بابا واحشني بوجع وقهرة في قلبي بتوجعني، واحشني ونفسي في حضنك قوى يطمني وتقول لي معلش”.
وفي ختام منشورها قالت: “الله يرحمك ويغفر لك، وكل من دعى لك وقال آمين”.
وفاة سامي العدل
يذكر أن أن الفنان الراحل سامي العدل توفي في حضن ابنته رشا، وكان يقيم معها هي ووالدتها بأيامه الأخيرة، وفقًا لتصريحات سابقة من نادية شكري لـ“تليجراف مصر”.